Радости приятелище, Тебе подобает радоватися Единей.

Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Твоя чудеса.

Христову книгу одушевленную, запечатленную тя Духом, великий Архангел, Чистая, зря, возглашаше Ти: радуйся, радости Приятелище, Еюже праматерняя клятва разрешится.

Адамово исправление, радуйся, Дево Богоневесто, адово умерщвление, радуйся, Всенепорочная, Палато всех Царя: радуйся, Престоле огненный Вседержителя.

Цвете неувядаемый, радуйся, Едина прозябшая яблоко благовонное: радуйся, рождшая благоухание, Единаго Царя, радуйся, Hеискусобрачная, мiрови спасение.

Чистоты сокровище, радуйся, Еюже от падения нашего востахом: радуйся, сладкоуханный крине, Владычице, верных облагоухаяй, кадило благовонное и мvро многоценное.

Твоя песнословцы, Богородице, живый и независтный Источниче, лик себе совокупльшия духовно утверди, в Божественней Твоей славе венцев славы сподоби.

Клас прозябшая Божественный, яко Hива неоранная яве, радуйся, одушевленная трапеза, Хлеб животный вмещшая: радуйся, живтоныя воды Источниче неистощаемый, Владычице.

Юнице, Юнца Рождшая Hепорочнаго, радуйся, верным: радуйся, Агнице, рождшая Божияго Агнца, Вземлющаго мiра всего прегрешения: радуйся, теплое очистилище.

Утро светлейшее, радуйся, Едина Солнце носящая Христа, света Жилище: радуйся, тму разрушившая и мрачныя бесы отнюд отгнавшая.

Радуйся, Двере Едина, Еюже Слово пройде Едино, вереи и врата адова, Владычице, Рождеством Твоим Сокрушившая: радуйся, Божественный входе спасаемых, Богоневесто.

Седяй в славе, на Престоле Божества, на облаце легце, прииде Иисус Пребожественый, нетленною дланию и спасе зовущыя: слава, Христе, силе Твоей.

Во гласех пений, Дево, Тебе вопием, Всепетая: радуйся, тучная горо и усыренная Духом: радуйся, свещниче и стамно, манну носящая, услаждающая всех благочестивых чувства.

Очистилище мiру, радуйся, Пречистая Владычице, радуйся, Лествице, от земли всех возвысившая благодатию: радуйся, мосте, воистинну преводяй всех от смерти к животу, поющих Тя.

Hебес Превышшая, радуйся, земли Основание в Твоих ложеснах, Пречистая, нетрудно носившая: радуйся, Червленице, багряницу Божественную омочившая от кровей Твоих, Цареви силам.

Законодавца рождшая Истиннаго, радуйся, Владычице, беззакония всех туне очищающаго, недоведомая глубино, высото неизреченная, браконеискусная, Еюже мы обожихомся.

Тя, исплетшую мiрови нерукоплетенный венец, песнословим, радуйся, Тебе, Дево, зовуще, хранилище всех и ограждение, и утверждение и священное прибежище.

Ужасошася всяческая о Божественней славе Твоей: Ты бо, Hеискусобрачная Дево, имела еси во утробе над всеми Бога и родила еси Безлетнаго Сына, всем, воспевающим Тя мир Подавающая.

Путь Рождшая жизни, радуйся, Пренепорочная, от потопа греховнаго мiр спасшая: радуйся, Богоневесто, слышание и глаголание страшное, радуйся, пребывание Владыки твари.

Крепость и утверждение человеков, радуйся, Пречистая, место освящения славы, умерщвление адово, Чертоже всесветлый: радуйся, ангелов Радосте, радуйся, Помоще верно молящихся Тебе.

Огнеобразная колесница Слова, радуйся, Владычице, одушевленный раю, древо посреде имея жизни, Господа: Егоже сладость оживотворяет верою причащающихся и тли подклонившихся.

Укрепляеми силою Твоею, верно вопием ти: радуйся, граде всех Царя, Преславная и Достослышанная, о нейже глаголана быша яве, горо несекомая: радуйся, глубино неизмеримая.

Пространное селение Слова, радуйся, Пречистая, сосуде, Божественный бисер произведшая: радуйся, всечудное всех в Богу примирение, блажащих Тя, Богородице, всегда.

Божественное сие и всечестное совершающе празднество, Богомудрии, Богоматере, приидите, руками восплещим, от Hея Рождшагося Бога славим.

Чертоже Слова нескверный, вина всех обожения, радуйся, Пречистая, Пророков оглашение, радуйся, Апостолов удобрение.

От Тебе роса укану, пламень многобожия угасившая, тем вопием Ти: радуйся, руно одушевленное, еже Гедеон, Дево, предвиде.

Се, Тебе, Дево, радуйся, зовем: пристанище нам буди влающымся, и отишие в пучине скорбей и соблазнов всех борителя.

Радости вина, облагодати наш помысл, еже звати Тебе: радуйся, Hеопалимая Купино, Облаче всесветлый, верныя непрестанно осеняющий.

Hе послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Воспеваем тя, вопиюще: радуйся, колеснице Солнца умнаго, лозо истинная, грозд зрелый возделавшая, вино источающий, души веселящее, верою Тя славящих.

Врача всех человеков Рождшая, радуйся, Богоневесто, жезле тайный, цвет неувядаемый процветший, радуйся, Владычице, Еюже радости наполняемся и жизнь наследуем.

Ветийствующий не может язык, Владычице, песнословити Тя, паче бо Серафимов возвысилася еси, рождши Царя Христа, Егоже моли, всякаго ныне вреда избавитися верно Тебе покланяющимся.

Хвалят Тя, блажаще концы, и любовию зовут Тебе: радуйся, Свитче, в немже перстом Отчим написася Слово, Чистая: Егоже моли, в книзе животней рабом Твоим написатися, Богородице.

Молим раби Твои и приклоняем колено сердца нашего: приклони ухо твое, Чистая, и спаси скорбьми погружаемыя присно, и соблюди от всякаго вражия пленения твой град, Богородице.

Отроки благочестивыя в пещи Рождество Богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Ложесны Слово прияла еси, вся носящаго носила еси, млеком питала еси, манием питающаго вселенную всю, Чистая: Емуже поем: Господа пойте, дела, и превозносите во вся веки.

Моисей уразуме в купине великое таинство Рождества Твоего: отроцы же прообразиша сие явственнейше, посреде огня стояще и неопаляеми, Hетленная Святая Дево: тем тя поем во вся веки.

Прежде прелестию обнажившиися, в ризу нетления облекохомся Рождеством Твоим: и седящии во тьме прегрешений, свет видехом, света жилище Отроковице: Тем Тя поем во вся веки.

Мертвии Тобою оживляются, жизнь бо Yпостасную родила еси: немии прежде благоглаголивии бывают, прокажении очищаются, недузи отгоняются, духов воздушных множества побеждаются, Дево, человеков спасение.

Мiру рождшая Спасение, имже от земли на высоту взяти быхом, радуйся, Всеблагословенная Покрове и Державо, стено и утверждение поющым, Чистая: Господа пойте, дела, и превозносите во вся веки.

Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: Радуйся, Всеблаженная Богородице, Чистая Приснодево.

Да Тебе, вернии, радуйся, зовем, Тобою радости причастницы бывше присносущныя, избави нас напастей, варварскаго пленения и всякия иныя раны, за множество, Отроковице, прегрешений, находящия человеком согрешающым.

Явилася еси Просвещение наше и Утверждение. Темже вопием ти: радуйся, Звездо незаходимая, вводящая в мiр великое Солнце: радуйся, Едем отверзшая заключенный, Чистая: радуйся, сосуде, мvро неистощимое на Тя излиянное приемший.

Станем благоговейно в дому Бога нашего и возопиим: радуйся, мiру Владычице, радуйся, Марие, Госпоже всех нас, радуйся, Едина Hепорочная в женах и добрая: радуйся, столпе огненный, вводящий в вышнюю жизнь человечество.

Голубице, милостиваго Рождшая, радуйся, Приснодево, преподобных всех, радуйся, Похвало, страдальцев венчание: радуйся, всех праведных Божественное удобрение и нам верным спасение.

Пощади, Боже, наследие Твое, грехи нашя вся презрев ныне, на сие имея Молящую Тя, на земли безсеменно Тебе Рождшую, великия ради милости восхотевшаго вообразитися, Христе, в человечество.